ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິງມິງ
(ພາບ: thanhnien.com.vn)
(vovworld)- ຍົກສູງບົດບາດຂອງວັດທະນະທຳທີ່ມີຕໍ່ການພັດທະນາແບບຍືນຍົງຂອງປະຊາຄົມອາຊຽນ. ນີ້ແມ່ນຫົວເລື່ອງຂອງກອງປະຊຸມລັດຖະມົນຕີວັດທະນະທຳອາຊຽນ ຄັ້ງທີ 6 (AMCA-6) ໄຂຂຶ້ນເມື່ອຕອນເຊົ້າວັນທີ 19/4, ຢູ່ນະຄອນເຫ້ວ ໂດຍມີການເຂົ້າຮ່ວມຂອງທ່ານຟ້າມບິງມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ, ທ່ານເລເລືອງມິງ, ເລຂາທິການໃຫ່ຍອາຊຽນ ພ້ອມດ້ວຍທ່ານລັດຖະມົນຕີວັດທະນະທຳ ແລະ ຫົວໜ້າຄະນະຜູ້ແທນບັນດາປະເທດອາຊຽນ, ຍີ່ປຸ່ນ. ກ່າວຄຳເຫັນທີ່ພິທີໄຂ, ທ່ານຮອງນາຍົກລັດຖະມົນຕີ ຟ້າມບິງມິງ ຖືວ່າ:
“ເມື່ອເຕື້ອງເຖິງບົດບາດຂອງວັດທະນະທຳທີ່ມີຕໍ່ການພັດທະນາແບບຍືນຍົງຂອງປະຊາຄົມອາຊຽນ ແມ່ນຕ້ອງເຕື້ອງເຖິງການນຳໃຊ້ບົດບາດຂອງພູມປັນຍາ, ວິທະ ຍາສາດ, ເຕັກໂນໂລຊີ ແລະ ບັນດາຮູບການສິລະປະເຂົ້າໃນຈຸດໝາຍຍົກສູງຄຸນນະພາບຊີວິດດ້ານວັດຖຸ ແລະ ຈິດໃຈຂອງ ປຊຊ ອາຊຽນ. ເຮັດໄດ້ຄືແນວນັ້ນ, ພວກເຮົາຈະສ້າງປະຊາຄົມອາຊຽນລວມ ທີ່ມີວັດທະນະທຳພິເສດສະເພາະ, ສາມັກຄີກັນໃນຫຼາຍຮູບຫຼາຍແບບ ແລະ ຍັງແມ່ນປະຊາຄົມພ້ອມກັນພັດທະນາ, ພ້ອມກັນມີຄວາມວັດທະນາຖາວອນ“.
ໃນຂອບເຂດກອງປະຊຸມ, ທ່ານ Wong Shuyn Tsai Lawrence ລັດຖະມົນຕີກະຊວງວັດທະນະທຳ, ປະຊາຄົມ ແລະ ຊາວໜຸ່ມສິງກະໂປ ໄດ້ມອບໃບຢັງຢືນ ແລະ ໂລໂກ “ນະຄອນວັດທະນະທຳອາຊຽນ“ ໃຫ້ການນຳແຂວງເທື່ອທຽນເຫ້ວ. ທ່ານຫງວຽນວັນກາວ, ປະທານຄະນະກຳມະການ ປຊຊ ແຂວງເທື່ອທຽນເຫ້ວ ຢືນຢັນວ່າ: ນີ້ແມ່ນຄວາມເປັນກຽດ, ຄວາມເອກອ້າງທະນົງໃຈອັນໃຫ່ຍຫຼວງສຳລັບອຳນາດການປົກຄອງ ແລະ ປຊຊ ແຂວງເທື່ອທຽນເຫ້ວ:
“ພວກຂ້າພະເຈົ້າຂໍໃຫ້ຄຳໝັ້ນສັນຍາວ່າຈະສືບຕໍ່ເສີມຂະຫຍາຍບັນດາຜົນງານທີ່ບັນລຸໄດ້, ສູ້ຊົນມານະພະຍາຍາມໂຄສະນາພາບພົດປະຊາຄົມອາຊຽນແຫ່ງສັນຕິ ພາບ, ສີວິໄລ, ປຊຊ ມີຄວາມຜາສຸກ ແລະ ພັດທະນາຮອບດ້ານ. ອຳນາດການປົກຄອງ ແລະ ປຊຊ ແຂວງເທື່ອທຽນເຫ້ວ ປາດຖະໜາວ່າ: ປະເທດຕ່າງໆໃນປະຊາຄົມອາຊຽນ ແລະ ເພື່ອນມິດສາກົນຈະສືບຕໍ່ເອົາໃຈໃສ່ເພື່ອໃຫ້ເຫ້ວກາຍເປັນບ່ອນພົບປະແລກປ່ຽນວັດທະນະທຳ, ຜ່ານນັ້ນຊຸກຍູ້ການອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກວັດທະນະທຳຂອງຊາດ, ຍູ້ແຮງການພັດທະນາເສດຖະກິດ, ສົມກັບນາມມະຍົດ ນະຄອນວັດທະນະທຳອາຊຽນ“./.