(vovworld) - ການເຈລະຈາລະຫວ່າງອາເມລິກາ ແລະ ຈີນ ກ່ຽວກັບບັນຫານິວເຄຼຍໃນແຫຼມເກົາຫຼີ ຖືກດຳເນີນໄປບົນຈິດໃຈສ້າງສັນ ແລະ ບັນລຸປະສິດທິຜົນ. ນີ້ແມ່ນຄຳຖະແຫຼງຂອງກະຊວງການຕ່າງປະເທດອາເມລິກາ ເມື່ອວັນທີ 15/04, ພາຍຫຼັງການແລກປ່ຽນຕ່າງໆຂອງວົງການເຈົ້າໜ້າທີ່ 2 ປະເທດຢູ່ສຳນັກຂອງຄະນະຜູ້ຕາງໜ້າ ອາເມລິກາປະຈຳສະຫະປະຊາຊາດ, ຢູ່ນິວຢອກ.
ຕາມຄຳຖະແຫຼງດັ່ງກ່າວ, ທູດພິເສດຈີນ ຜູ້ຮັບຜິດຊອບບັນດາບັນຫາໃນແຫຼມເກົາຫຼີ ວູຕາຍອວຍ ຈະສືບຕໍ່ພົບປະກັບທູດພິເສດ Davies ແລະ ບັນດາເຈົ້າໜ້າທີ່ອື່ນໆຂອງອາເມລິກາ ຢູ່ນະຄອນຫຼວງ ວໍຊິງເຕີນ ໃນວັນທີ 18/04 ຈະມາເຖິງ. ໃນຂະນະນັ້ນ, ໃນອາທິດໜ້າ, ຄາດວ່າ ທ່ານປະທານາທິບໍດີອາເມລິກາ Barack Obama ຈະມີການຢ້ຽມຢາມ ຍີ່ປຸ່ນ ແລະ ສ.ເກົາຫຼີ ໃນລາຍການໄປປະຕິບັດງານຢູ່ອາຊີ. ຢູ່ທີ່ນີ້, ທ່ານ Obama ຈະພ້ອມກັບການນຳ 2 ປະເທດປຶກສາຫາລືກ່ຽວກັບສະພາບການຢູ່ສປປ.ເກົາຫຼີ ຢ່າງເລິກເຊິ່ງກວ່າອີກ.
ກ່ອນໜ້ານັ້ນ, ໃນວັນດຽວກັນ, ໂຄສົກກະຊວງການຕ່າງປະເທດຈີນ ຄວາຈວນຢິງ ໄດ້ກ່າວເຕື່ອນບັນດາຝ່າຍຄວນຫຼີກລ້ຽງບັນດາການກະທຳທີ່ພາໃຫ້ສະພາບການຢູ່ແຫຼມເກົາຫຼີ ເຄັ່ງຕຶງຂຶ້ນຕື່ມ.