ຫວຽດນາມ ເຂົ້າຮ່ວມກອງປະຊຸມເຈົ້າໜ້າທີ່ຂັ້ນສູງ ອາຊຽນ - ຈີນ ຄັ້ງທີ 20
ທ່ານ ຟ້າມກວາງວິງ, ຮອງລັດຖະມົນຕີການຕ່າງປະເທດ
(ພາບປະກອບ)
(vovworld) - ທ່ານ ຟ້າມກວາງວິງ, ຮອງລັດຖະມົນຕີການຕ່າງປະເທດ, ຫົວໜ້າຄະນະເຈົ້າໜ້າທີ່ຂັ້ນສູງ ອາຊຽນ - ຫວຽດນາມ, ໄດ້ນຳໜ້າຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມບັນດາເຈົ້າໜ້າທີ່ຂັ້ນສູງ(SOM) ອາຊຽນ - ຈີນ ຄັ້ງທີ 20 ກ່ຽວກັບສາຍພົວພັນຄູ່ຮ່ວມມື ອາຊຽນ - ຈີນ ແລະ ກອງປະຊຸມຄັ້ງທີ 7 ກ່ຽວກັບການປະຕິບັດ ຖະແຫຼງການການປະພຶດຂອງບັນດາຝ່າຍຢູ່ທະເລຕາເວັນອອກ(DOC)ແລະທາບທາມຄວາມເຫັນຢ່າງເປັນທາງການກ່ຽວກັບຂໍ້ກຳນົດການປະພຶດຢູ່ທະເລຕາເວັນອອກ(COC), ຊຶ່ງດຳເນີນໄປແຕ່ວັນທີ 21/4 – 22/4/2014 ຢູ່ປະເທດ ໄທ. ທີ່ກອງປະຊຸມ, ຄະນະຜູ້ແທນ ຫວຽດນາມເປັນເຈົ້າການໃນການທາບທາມຄວາມເຫັນ, ຕັ້ງໜ້າຊຸກຍູ້ການໂອ້ລົມສົນທະນາ ອາຊຽນ - ຈີນ; ກໍ່ຄືສາມັກຄີດ້ວຍຫຼັກໝັ້ນລວມຂອງ ອາຊຽນ. ກ່າວຄຳເຫັນທີ່ກອງປະຊຸມ, ທ່ານຮອງລັດຖະມົນຕີ ຟ້າມກວາງວິງ ຕີລາຄາສູງຄວາມສຳຄັນຂອງສາຍພົວພັນຄູ່ຮ່ວມມືຍຸດທະສາດ ອາຊຽນ - ຈີນ ກໍ່ຄືບັນດາໝາກຜົນການຮ່ວມມືທີ່ບັນລຸໄດ້ໃນໄລຍະຜ່ານມາ. ທ່ານຮອງລັດຖະມົນຕີ ຟ້າມກວາງວິງ ກໍ່ເນັ້ນໜັກຄວາມສຳຄັນຂອງການຮັບປະກັນສັນຕິພາບ, ຄວາມໝັ້ນຄົງ, ປ້ອງກັນຄວາມສະຫງົບ ແລະ ຄວາມປອດໄພທາງທະເລຢູ່ທະເລຕາເວັນອອກ; ເລື່ອງຊຸກຍູ້ການທາບທາມຄວາມເຫັນຢ່າງຕັ້ງໜ້າ ແລະ ແທດຈິງລະຫວ່າງ ອາຊຽນ - ຈີນ ; ປະຕິບັດໃຫ້ຄົບຖ້ວນຖະແຫຼງການ DOC; ເຄົາລົບປະຕິບັດຕາມກົດໝາຍສາກົນ ແລະ ສົນທິສັນຍາກ່ຽວກັບກົດໝາຍວ່າດ້ວຍທະເລຂອງ ສປຊ ປີ 1982.