ຕອນເຊົ້າວັນທີ 30/12, ກະຊວງແຜນການ ແລະ ການລົງທຶນ ຫວຽດນາມໄດ້ຈັດຕັ້ງການປະຊຸມຂ່າວປະກາດສະພາບການລົງທຶນໂດຍກົງຂອງຕ່າງປະເທດໃນປີ 2011 ແລະ ການຄາດຄະແນ ຂອງປີ 2012. ທ່ານ ຫງວຽນເທເຟືອງ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນຫວຽດນາມ ໃຫ້ຮູ້ວ່າ: ໄລ່ມາຮອດວັນທີ 15/12, ທັງປະເທດ ມີເກືອບ13.670 ໂຄງການ ມີເງິນລົງທຶນໂດຍກົງຂອງຕ່າງປະເທດຍັງມີຜົນສັກສິດ ດ້ວຍຍອດຈຳນວນທຶນຈົດທະບຽນ 198 ຕຶ້ USD. ໃນຳນວນບັນດາຄູ່ຮ່ວມມືລົງທຶນໃຫຍ່: ສິງກະໂປ ສືບຕໍ່ນຳຫນ້າ ດ້ວຍຍອດຈຳນວນທຶນຈົດທະບຽນກວ່າ 24 ຕຶ້ USD, ຖັດມາແມ່ນ ສ ເກົາຫລີ, ຍີ່ປຸ່ນ ແລະໄຕ້ຫວັນ. ນະຄອນ ໂຮ່ຈິມີນ ຍັງຄົງແມ່ນທ້ອງຖິ່ນດຶງດູດທຶນ FDI ຫລາຍກວ່າໝູ່ ດ້ວຍຈຳນວນເງິນກວ່າ 32 ຕຶ້ USD ຍັງມີຜົນສັກສິດ, ຖັດມາແມ່ນ ບ່າເຣ້ຍ ຫວູງເຕົາ, ຮ່າໂນ້ຍ, ດົ່ງນາຍ ແລະ ບີ່ງເຢືອງ. ກ່ຽວກັບວຽກງານດຶງດູດເງິນລົງທຶນຈາກຕ່າງປະເທດໃນປີ 2012, ທ່ານ ຫງວຽນເທເຟືອງ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນໃຫ້ຮູ້ວ່າ:
“ ປີ 2012, ການຄຸ້ມຄອງທຶນ FDI ໄດ້ສຸມໃສ່ ແລະ ເພີ່ມທະວີຕາມທິດຍົກສູງຄຸນນະພາບປະສິດທິຜົນ ທຶນ FDI, ຍົກສູງຜົນສັກສິດ, ປະສິດທິຜົນການບໍລິຫານລັດ ແລະ ສ້າງກົນໄກບໍລິຫານລັດກ່ຽວກັບທຶນ FDI ສຳເລັດ. ເລື່ອງດຶງດູດທຶນ FDI ຈະບໍ່ສຸມໃສ່ກ່ຽວກັບທຶນຈົດທະບຽນ ຫາກສຸມໃສ່ເຂົ້າໃນການປ່ອຍທຶນ FDI, ດຶງດູດທຶນ FDI ໃຫ້ສອດຄ່ອງກັບແຜນການພັດທະນາ 2011- 2015 ພ້ອມທັງດຶງດູດ ທຶນ FDI ມີການເລືອກເຟັ້ນ, ມີການກຳນົດທິດເຂົ້າໃນຂົງເຂດຄື: ພື້ນຖານໂຄງລ່າງ, ອຸດສາຫະກຳຂຽວ, ໃກ້ຊິດສະຫນິດສະຫນົມກັບສິ່ງແວດລ້ອມ.“
ເພື່ອດຶງດູດແຫລ່ງເງິນລົງທຶນຈາກຕ່າງປະເທດ, ສ້າງແຫລ່ງກຳລັງແຮງສຳຄັນເພື່ອພັດທະນາປະເທດຊາດ. ລັດຖະບານຫາກໍອອກຄຳສັ່ງເພີ່ມທະວີການປະຕິບັດ ແລະ ປັບປຸງວຽກງານຄຸ້ມຄອງການລົງທຶນໂດຍກົງຂອງຕ່າງປະເທດໃນໄລຍະຈະມາເຖິງ, ປັບປຸງຫລາຍນະໂຍບາຍທີ່ກ່ຽວຂ້ອງເຖິງການລົງທຶນ, ແກ້ໄຂບັນຫາທີ່ຂາດຕົກບົກຜ່ອງພວມກີດຂວາງເຖິງການດຶງດູດເງິນລົງທຶນຈາກຕ່າງປະເທດເຂົ້າຫວຽດນາມ./.